អ៊ីរ៉ង់៖ រដ្ឋមន្ត្រីមហាផ្ទៃអ៊ីរ៉ង់លោក Ahmad Vahidi ថ្លែងថា នៅថ្ងៃព្រហស្បតិ៍ ទី៣០ ខែឧសភានេះបានចាប់ផ្តើមទទួលពាក្យបេក្ខជនឈរឈ្មោះសម្រាប់ការបោះឆ្នោតប្រធានាធិបតីថ្មី បន្ទាប់ពីលោកប្រធានាធិបតី Ebrahim Raisi បានទទួលមរណភាពក្នុងឧបទ្ទវហេតុធ្លាក់ឧទ្ធម្ភាគចក្រកាលពីពេលថ្មីៗនេះ។ 

គួរបញ្ជាក់ថា បច្ចុប្បន្ននេះមេដឹកនាំកំពូលលោក Ayatollah Ali Khamenei អាចទំនងជាត្រូវគេមើលឃើញថាបានសម្លឹងរកបានអ្នកបន្តតំណែងទៅ ស្របពេលដែលអ៊ីរ៉ង់ប្រកាសអំពីការដាក់បេក្ខភាពប្រធានាធិបតីភ្លាមៗបែបនេះ នាំឱ្យមានការប្រជែងគ្នាកាន់តែខ្លាំងសម្រាប់តំណែងកំពូលមួយនេះ។ បើតាមការបញ្ជាក់ ក្រោយពីបើកដំណើរការដាក់ពាក្យស្នើសុំឈរជាប្រធានាធិបតី ក្រុមប្រឹក្សាធម្មនុញ្ញដែលទទួលបន្ទុកការបោះឆ្នោត និងការពិនិត្យឯកសារច្បាប់ នឹងពិនិត្យលើឯកសារនៃបេក្ខជនឈរឈ្មោះជាប្រធានាធិបតី។

រដ្ឋមន្រ្តីមហាផ្ទៃបានថ្លែងតាមរយៈកញ្ចក់ទូរទស្សន៍រដ្ឋថា៖ "ដំណើរការពិនិត្យលើឯកសារនៃបេក្ខភាពចុះបញ្ជីឈរឈ្មោះជាបេក្ខភាពប្រធានាធិបតីមានរយៈពេល ៧ថ្ងៃ ហើយបេក្ខជនដែលទទួលបានបេក្ខភាពឈរឈ្មោះជាប្រធានាធិបតីមានរយៈពេល ១៤ថ្ងៃដើម្បីធ្វើយុទ្ធនាការឃោសនាបោះឆ្នោត"។ បើតាមប្រភពដដែលបញ្ជាក់ ក្រុមប្រឹក្សាធម្មនុញ្ញរបស់អ៊ីរ៉ង់នឹងចេញផ្សាយបញ្ជីឈ្មោះបេក្ខភាពប្រធានាធិបតីផ្លូវការនាថ្ងៃទី១១ ខែមិថុនាខាងមុខនេះ។ 

បេក្ខជនដែលគេរំពឹងថានឹងអាចចូលខ្លួនមកប្រជែងតំណែងប្រធានាធិបតីនៅពេលនេះរួមមាន លោក Parviz Fattah អតីតសមាជិកនៃក្រុមប្រឹក្សាធម្មនុញ្ញ, ប្រធានាធិបតីស្ដីទី លោក Mohammad Mokhber រួមជាមួយលោក Ali Larijani អ្នកនាំពាក្យនៃសភាអ៊ីរ៉ង់ ខណៈដែលលោក Larijani ធ្លាប់ត្រូវបានគេដកឈ្មោះចេញពីការប្រជែងតំណែងប្រធានាធិបតីនៅឆ្នាំ២០២១ ម្តងរួចមកហើយ៕